Rom 13 | NdeIBE | STEP | Umuntu wonke kumele azithobe kulabo ababusayo, ngoba akukho mbuso ngaphandle kwalowo obekwe nguNkulunkulu. Imibuso ekhona ibekwe nguNkulunkulu.

Romans 13

Ukuzithoba Kubabusi

1 Umuntu wonke kumele azithobe kulabo ababusayo, ngoba akukho mbuso ngaphandle kwalowo obekwe nguNkulunkulu. Imibuso ekhona ibekwe nguNkulunkulu.

2 Ngakho, lowo ovukela umbuso uvukela okumiswe nguNkulunkulu, njalo labo abenza njalo bazilethela ukwahlulelwa. 3 Ngoba ababusi kabesabeki kulabo abenza okulungileyo, kodwa kulabo abenza okubi. Liyafuna ukukhululeka ekwesabeni lowo obusayo na? Ngakho yenzani okulungileyo yena uzalincoma.

4 Ngoba yena uyinceku kaNkulunkulu yokulenzela okuhle. Kodwa uma lisenza okubi, yesabani, ngoba inkemba kayiphatheli ize. Uyinceku kaNkulunkulu, ummeli wentukuthelo ukuba ehlisele isijeziso kowenza okubi.

5 Ngakho, kuyaswelakala ukuzithoba kubabusi, hatshi kuphela ngenxa yokujeziswa okungenzakala kodwa langenxa yesazela.

6 Ngenxa yalokhu futhi yikho nje lithela imithelo, ngoba ababusi bayizinceku zikaNkulunkulu, ezinikela isikhathi sazo sonke ekubuseni. 7 Phanini abantu bonke okungokwabo: Uma ungathelanga, thela imithelo, uma kuyikuqoqwa kwemali, iqoqeni. Uma kuyikuhlonipha, hloniphani; uma kuyikudumisa, dumisani.

Thandani, Ngoba Usuku Seluseduze

8 Lingayekeli umlandu ungahlawulwanga, ngaphandle kokuqhubeka komlandu wokuthandana, ngoba lowo othanda umuntu wakibo usewugcwalisile umthetho. 9 Imilayo ethi, “Ungafebi,” “Ungabulali,” “Ungebi,” “Ungahawukeli” kanye leminye imilayo engabe ikhona ihlanganiswa ngumthetho lo othi: “Thanda umakhelwane wakho njengoba uzithanda wena.” 10 Uthando kalwenzi ngozi kumakhelwane. Ngakho uthando luyikugcwaliswa komthetho.

11 Njalo yenzani lokhu liqedisisa isikhathi sakhathesi. Isikhathi sesifikile ukuba livuke ebuthongweni benu, ngoba ukusindiswa kwethu khathesi sekuseduze kakhulu kulekuqaliseni kwethu ukukholwa. 12 Ubusuku sebuzadlula; ukusa sekusondele. Ngakho kasilahleni imisebenzi yobumnyama sigqoke isivikelo sokukhanya.

13 Kasiziphatheni kuhle, njengasemini, hatshi emadilini okuminza lokudakwa, hatshi ekuxhwaleni kokufeba lentokozo yobugangi, hatshi ngokuxabana langomona. 14 Kodwa zigqokiseni iNkosi uJesu Khristu, njalo lingacabangi ngokuthokozisa inkanuko yemvelo yenu yokona.